فوتو: ۇلتتىق ۇلان
ءىس-شاراعا اسكەري قىزمەتشىلەر, ارداگەرلەر, زيالى قاۋىم وكىلدەرى مەن قوناقتار قاتىستى. ءدارىسحانانىڭ اشىلۋى باتىردىڭ ەرلىك جولىن ۇلىقتاپ, ونىڭ مول مۇراسىن جاس ۇرپاققا ناسيحاتتاۋعا باعىتتالعان ماڭىزدى رۋحاني شارا بولدى.
سالتاناتتى جيىندا اسكەري ءبولىم كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پودپولكوۆنيك جانىبەك سارسەنوۆ قۇتتىقتاۋ ءسوز سويلەپ, مالىك عابدۋللين ەسىمىن دارىپتەۋدىڭ ماڭىزىن اتاپ ءوتتى. سونىمەن قاتار زاپاستاعى پوليتسيا پولكوۆنيگى, ءىىم-ءنىڭ قۇرمەتتى ارداگەرى جانە كوكشەتاۋ قالاسىنىڭ قۇرمەتتى ازاماتى حابيبۋللا عازيزوۆ باتىردىڭ ەل تاريحىنداعى ەرەكشە ورنى تۋرالى ءوز ويلارىمەن ءبولىستى.
شارا بارىسىندا ازامات قادىل ورىنداعان «ماقتانامىن» ءانى كوپشىلىككە كوتەرىڭكى كوڭىل كۇي سىيلادى.
ءدارىسحانانىڭ اشىلۋ راسىمىندە اسكەري ءبولىم كومانديرى پولكوۆنيك بەرىك قوجاحمەتوۆ, مالىك عابدۋللين اتىنداعى ازاماتتىق قورعاۋ اكادەمياسى باستىعى گەنەرال-مايور جۇمابەك حاسەنوۆ جانە حابيبۋللا عازيزوۆ سالتاناتتى تۇردە لەنتا قيىپ, جاڭا ءدارىسحانانى اشتى.
ءىس-شارا سوڭىندا قاتىسۋشىلار مالىك عابدۋلليننىڭ ءومىرى مەن جاۋىنگەرلىك جولىنا ارنالعان دارىسحانامەن تانىسىپ, باتىر تۋرالى 1943 جىلى تۇسىرىلگەن تاريحي دەرەكتى ءفيلمدى تاماشالادى.
بىلتىر جەڭىستىڭ 80 جىلدىعى قارساڭىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە مالىك عابدۋللين اتىنداعى ءدارىسحانا اشىلعانى ءمالىم.
